Şuşada Vaqif Poeziya Günlərinə "Vaqif dünyası" tamaşası ilə yekun vuruldu

Şuşada keçirilən Vaqif Poeziya Günlərinin sonuncu tədbiri “Vaqif dünyası” adlı poetik-musiqili tamaşa olub.

Tamaşada Molla Pənah Vaqif, Molla Vəli Vidadi, Məhəmməd Füzuli, Əlişir Nəvai, Şah İsmayıl Xətai və Türk dünyasının digər şairlərinin obrazları canlandırılıb.

Yazıçılar Birliyinin katibi, yazıçı İlqar Fəhmi Vaqif Poeziya Günlərinin əhəmiyyəti barədə bildirib ki, bu il çox unikal və fərqli məqamlar olub.

“Birinci məqam ondan ibarət idi ki, bu poeziya bayramı Qazaxda başladı. Şairin vətənində və sovet dövründə olduğu kimi, Qazaxda start verilən bayram şənlikləri Şuşaya ötürüldü və iki gün ərzində burada çox gözəl tədbirlər keçirildi. Bu il iki əlamətdar hadisə üst-üstə düşüb. Ulu Öndər Heydər Əliyevin 100 illik yubileyi və Şuşanın Türk dünyasının mədəniyyət paytaxtı elan olunması”, – deyə yazıçı bildirib.

Ədib əlavə edib ki, “Vaqif dünyası” tamaşasını hazırlayanda əsas məqsəd onun müasir Azərbaycan ədəbi dilinin formalaşmasında və ümumiyyətlə, ümumtürk kontekstində yerini göstərmək olub.