Üfunətli suda saxlanılan balıqlar satılıb?

Bakı-Siyəzən-Quba avtomagistralının kənarındakı ərazidə sanitariya və gigiyena qaydalarına əməl olunmadan satılan balıqlar süni gölməçələrdə üfunətli suda ölü balıqlarla birgə saxlanılır.

Bu antisanitar vəziyyət Daxili İşlər Nazirliyi Su Nəqliyyatında Polis İdarəsi və Ekologiya və Təbii Sərvətlər Nazirliyinin əməkdaşlarının nəzarət-profilaktik yoxlamaları nəticəsində ortaya çıxıb. Keçirilən birgə nəzarət tədbirləri zamanı Sumqayıt, Siyəzən, Şabran və Xudat şəhərlərində qanunsuz ovlanmış körpə nərə cinsli balıqların satıldığı müəyyən edilib.

Araşdırma zamanı Xəzər dənizinə nəsil artımı üçün buraxılan körpə nərə cinsli balıqların icazəsiz tutulub satılmasını təşkil edənlərin Əbülfəz Mirzəyev, Vüqar Əsgərov, Həkim Məsimov, Ramil Ağamalıyev, Yaqub Dadaşov, Elvin Həsənov, Kamal Ədilov və Rasim Məhərrəmov olduğu müəyyən edilib. Bu şəxslər barəsində protokol tərtib olunub və qanunamüvafiq tədbirlər görülüb.

Su Nəqliyyatında Polis İdarəsinin Brokonyerliklə Mübarizə Bölməsinin və digər aidiyyəti dövlət orqanlarının əməkdaşları tərəfindən Nizami rayonu “8-ci kilometr” qəsəbəsində yerləşən bazarda da sanitar qaydalara əməl olunmadan balıqların, eləcə də nərə cinsli balıq körpələrinin satıldığı müəyyən edilib.

Su polisləri tərəfindən ökə ərazisində qanunsuz balıq ovu, xüsusən də Xəzər dənizinə nəsil artımı üçün buraxılan körpə nərəcinsli balıqların ovunun və satışının qarşısını almaq məqsədilə keçirilən nəzarət tədbirləri Xaçmaz, Lənkəran, Neftçala və Salyan şəhərlərində də davam etdirilir.