Obyektlərdə ətlərlə bağlı görün nə aşkarlandı | Restoranlara ciddi xəbərdarlıq

Qanunsuz ov ətlərinin istifadəsi və satışı ilə bağlı restoranlara son xəbərdarlıq edilib.

Bu barədə IDEA İctimai Birliyindən məlumat verilib.

İctimai iaşə müəssisələrində qanunsuz ov ətlərinin istifadəsi və satışına, həmçinin sanitar-gigiyenik tələblərə uyğunluğuna nəzarət məqsədilə IDEA İctimai Birliyi və Qida Təhlükəsizliyi Agentliyi tərəfindən Ekologiya və Təbii Sərvətlər Nazirliyinin əməkdaşları ilə birgə ölkə ərazisində fəaliyyət göstərən ümumilikdə 581 qida obyektində monitorinqlər həyata keçirilib.

Araşdırmalar zamanı 42 obyektdə qanunsuz ov əti məhsullarından istifadə edilməsi halları müşahidə edilib.

Belə ki, Bakıda 10, regionlarda isə 32 müəssisədə ov məhsullarının istehlaka verilməsi faktı müəyyən olunub.

Ümumilikdə monitorinqlər zamanı sözügedən müəssisələrdə qanunsuz ovlanmış vəhşi heyvanların ətləri, habelə “Qırmızı kitab”a daxil edilən turac və tirəndaz, yəni oxlu kirpi ətləri aşkar edilib. Məhsullar möhürlənərək dərhal satışdan kənarlaşdırılıb, həmçinin sanitar pozuntularla bağlı sahibkarlar barəsində inzibati tədbir görülüb.

Qeyd edək ki, monitorinqlər zamanı 7 obyektdə aşkarlanan “Qırmızı kitab”a daxil edilən tirəndaz, yəni oxlu kirpi və turac ətləri ilə bağlı Ekologiya və Təbii Sərvətlər Nazirliyi tərəfindən zəruri araşdırma aparılır.