Ulu Öndərin 100 illik yubileyinə həsr edilmiş konfrans

Medianın İnkişafı Agentliyi və Audiovizual Şura ümummilli lider Heydər Əliyevin 100 ilik yubileyinə həsr olunan konfrans keçirib.

Konfransda çıxış edən Audiovizual Şuranın sədri İsmət Səttarov qeyd edib ki, Azərbaycanda bütün sahələrdə olduğu kimi peşəkar mətbuatın formalaşması və sürətli inkişafı ulu öndərin adı ilə bağlıdır.

Onun sözlərinə görə, azad mətbuatın inkişafına əngəl yaradan süni maneələrin aradan qaldırılması, qanunvericiliyin təkmilləşdirilməsi, kütləvi informasiya vasitələrinin maddi-texniki bazasının möhkəmləndirilməsi, media işçiləri mütəmadi görüşlər kimi ənənələrin yaradılması Heydər Əliyevin azad sözə və media işçilərinə verdiyi dəyərin bariz nümunəsidir.

Medianın İnkişafı Agentliyinin İcraçı direktoru Əhməd İsmayılov ümummilli lider Heydər Əliyevin medianın işini, jurnalist əməyini daim yüksək qiymətləndirdiyini, jurnalist peşəsinə hər zaman dərin hörmət bəslədiyini, mətbuat işçiləri ilə yaxın təmasda olduğunu bildirib.

Digər tədbir iştirakçıları da Heydər Əliyevin mediaya verdiyi önəmdən söz açıb, ümummilli liderlə bağlı xatirələrini bölüşüblər.

Çıxışlardan sonra konfrans “Ümummilli lider Heydər Əliyevin media siyasəti və müasir Azərbaycan mediası” mövzusunda keçirilən panel sessiya ilə davam edib.