Ümummilli liderin xarici siyasət prioritetlərinə həsr olunan konfrans keçirilib

“Heydər Əliyev 1990-cı illərlə bağlı olan bütün problemləri həll edə bilib”.

Bu fikirləri Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev Bakıda keçirilən “Ümummilli lider Heydər Əliyevin xarici siyasət prioritetləri” adlı konfransda deyib. Bildirib ki, konfransın məqsədi Heydər Əliyevin siyasi irsini müzakirə etməkdir.

TASS-ın baş direktorunun birinci müavini Mixail Qusman da çıxışında ulu öndərin şəxsi keyfiyyətlərinə, siyasi fəaliyyətinə diqqət çəkib. Heydər Əliyevi uğurlar qazanan Azərbaycanın memarı adlandırıb: “Mənə müsahibəsində uşaqlıqdan bəri memar olmaq istədiyini demişdi. O, memar oldu. Amma hansısa binanın yox, öz ölkəsinin memarı oldu”.

Qeyd olunub ki, ümummilli lider Heydər Əliyevin ölkənin iqtisadi inkişafına verdiyi töhfələr sayəsində Azərbaycan hazırda Cənubi Qafqaz regionunda lider ölkədir.