Xəyanətə görə ailəsi dağılan aktyor | "İlk sevgisinə qovuşmadı, böyük sarsıntı yaşadı" - RETRO BAKU

“Retro Baku” verilişinin yeni buraxılışı tanınmış kinoaktyor, “Bir qalanın sirri”nin Elşəni Gündüz Abbasova həsr olunub.

Verilişdə sənətkarın yaxınları onun həyat yolu, şəxsi taleyi barədə xatirələrini bölüşüblər.

Aktyorun qızı Dildar Abbasova atasının gənclik illərində yaşadığı sevgi hekayəsini belə xatırlayıb:

“Atam anamdan əvvəl başqa bir qızı sevib. O qız da atamı çox sevirmiş. Eşitdiyimə görə, atamdan bir kurs yuxarıda oxuyub, amma onunla eyni kursda olmaq üçün bir il təhsildən qalıb. Atası və anası ayrıldığı üçün həmin qızı nənəsi böyüdüb. Nənəm isə imkanlı və köklü bir ailədən olduğu üçün nənəsinin himayəsində böyüyən o qızın atamla ailə qurmasına razılıq verməyib. Taleyin ironiyası ondadır ki, illər sonra atamın da ailəsi dağıldı və biz də nənəmin yanında böyüdük”.

Kinoşünas Aydın Kazımzadə aktyorun şəxsi həyatında yaşadığı çətinliklərdən danışıb:

“Gündüz Akademik Milli Dram Teatrının məşhur aktrisası Hökümə Qurbanova ilə illər ərzində əlaqədə olub. Bu münasibət son nəticədə aktyorun ailəsinin dağılmasına səbəb oldu. Hökümə Qurbanovanı dəhşətli dərəcədə sevirdi. O sevgi həm ailəsini dağıtdı, həm də Gündüzü təkliyə məhkum etdi”.

Aktyorun nəvəsi Şəmsəddin Abbasov isə babasının son sözlərini xatırladıb: “Son nəfəsini verərkən “peşmanam” deyib. Bu onu göstərir ki, babam, bəlkə də, öz potensialını tam istifadə edə bilmədiyini düşünüb”.