Xocalıda daha bir kütləvi məzarlıq | Qazıntı işlərindən anbaan görüntülər

Xocalıda ən azı 4 nəfərin basdırıldığı kütləvi məzarlıq aşkar edilib. Bu barədə Baş Prokurorluğun Mətbuat Xidmətindən məlumat verilib.

Bildirilib ki, kütləvi insan qalıqları Xocalı şəhərinin mərkəzində, keçmiş xalça fabrikinin yaxınlığında qazıntı işləri zamanı aşkar edilib.

Qeyd olunub ki, tapılan sümük fraqmentləri ekspertiza və laborator müayinələrin aparılması məqsədilə götürülüb.

Prokurorluğun xəbərinə görə, qalıqların işgəncələrə məruz qalması, əllərinin kəndirlə bağlanması və xüsusiyyətlərinə görə ən azı 25 il əvvəl basdırılması müəyyən edilib.

Aşkar edilən insan sümüklərindən birinin azyaşlıya məxsus olması ehtimal edilir. Hazırda hadisə yerinin tam müayinə edilməsi istiqamətində işlər davam etdirilir.

Faktla bağlı Baş Prokurorluğun Kriminalistika və informasiya texnologiyaları idarəsində araşdırma aparılır. Axtarış işləri tam yekunlaşdıqdan və müvafiq ekspertiza nəticələri müəyyən olunduqdan sonra ictimaiyyətə əlavə məlumat veriləcək.