Xroniki ağrılar, əzginlik və əsəbilik nəyin əlamətidir? - Qarşısını almaq üçün...

"D" vitamini sümüklərin, dişlərin və immun sisteminin sağlamlığının qorunmasında əsas rol oynayır. Onun çatışmazlığı uşaqlarda raxit və böyüklərdə osteoporoz kimi ciddi sağlamlıq problemlərinə səbəb ola bilər.

Bəs "D" vitamini çatışmazlığını necə aradan qaldırmaq olar?

Rusiyalı həkim Olqa Çirkovanın sözlərinə görə, dərinin quruması, saç tökülməsi, sümük əriməsi, xroniki ağrılar, əzginlik, əzələ zəifliyi, yuxu pozuntuları, əsəbilik və hətta depressiya "D" vitamininin azlığından xəbər verə bilər.

O bildirib ki, düzgün qidalanma və günəş şüalarından faydalanmaq bu problemi aradan qaldırmaqda əsas rol oynayır. "D" vitamini çatışmazlığının qarşısını almağın ən dadlı yollarından biri isə yağlı balıq növlərini qida rasionuna daxil etməkdir. Bundan əlavə, yumurta sarısı, kərə yağı, bərk pendir və xama da istehlak etmək tövsiyə olunur.

Qeyd edək ki, dünyada bir milyarddan çox insanın orqanizmində "D" vitamini çatışmır.