Yaylaqlara erkən köç başladı

Adətən yaylaq mövsümü may ayının 20-dən sonra balşansa da, bu il Mərkəzi Aran zonasında qoyunçuluq təsərrüfatı ilə məşğul olan fermerlər yem ehtiyatının az olması səbəbindən bir ay tez köç etməyə başlayıblar.

Təsərrüfat sahiblərinin sözlərinə görə, artıq son iki ildə yağıntıların az düşməsi səbəbindən qışlaqlarda yem ehtiyatı olmur. Bunun da nəticəsində havaların soyuq olmasına baxmayaraq, yaylaqlara erkən köç etməyə başlanılır. Əsas istiqamət isə Şamaxı və Quba yaylaqları olur.

Bir həftə sürü ilə bərabər yol gedən çobanlar Şamaxı yaylaqlarına çatdıqdan sonra bir müddət orada məskən salmalı olurlar. Çünki hazırda Quba yaylaqlarında havaların soyuq olması səbəbindən heyvanların tələf olma ehtimalı nəzərə alınır.

15-20 gün Şamaxı yaylaqlarında qalan sürü bundan sonra Quba yaylaqları istiqamətində hərəkət etməyə başlayır. Ümumilikdə 300 km-lik məsafə 20 gün ərzində qət edilir. 6 ay yaylaq həyatından sonra isə sürü yenidən qışlağa köç etməyə başlayır.