Yuxuda dişləri qıcamağın səbəbi | Bunlara fikir vermirsiniz, amma...

Dişlərin sürtülməsi Parkinson xəstəliyinin əlaməti ola bilər.

Bruksizm adlanan xəstəlik əsasən yuxu zamanı baş verən, çənələrin qeyri-iradi şəkildə sıxılması və dişlərin bir-birinə sürtülməsidir. Bu, müxtəlif xəstəliklərə, o cümlədən Parkinson xəstəliyinə işarə edə bilər.

Uşaq nevroloqu Nataliya Stepanenko “Gazeta.Ru”ya verdiyi müsahibəsində bu cür deyib.

“Əgər buna fikir verilməzsə, diş minasının yeyilməsinə və düzgün olmayan diş qapanmasına səbəb ola bilər. Bruksizmin səbəbləri müxtəlifdir. Əsas əlaməti dişlərin qıcırtısıdır, bu da adətən gecə müşahidə olunur. İnsan bunun fərqində olmur, amma yaxınları bu səsləri eşidə bilərlər. Eyni zamanda baş ağrıları, çənədə narahatlıq və hətta diş zədələnmələri müşahidə oluna bilər. Bəzən bruksizm üz ağrılarına, başgicəllənməyə və diqqət toplamaqda çətinliklərə də səbəb olur. Diaqnoz qoymaq üçün stomatoloqa və ya nevroloqa müraciət etmək lazımdır. Həkim ağız boşluğunu müayinə edəcək və xəstənin şikayətlərini dinləyəcək.

Bəzi hallarda diaqnostika üçün bruks-çeker adlı xüsusi ağız qoruyucusundan istifadə olunur. Bu qoruyucu gecə taxılır və səhər onun üzərindəki zədələrə əsasən bruksizmin dərəcəsi müəyyən edilir. Xəstəliyin müalicəsi onun səbəblərindən və ağırlıq dərəcəsindən asılıdır. Kiçik yaşlı uşaqlarda bu xəstəlik çox zaman öz-özünə keçib gedir və müdaxiləyə ehtiyac olmur. Böyüklərə isə adətən sakitləşdirici dərmanlar, əzələləri boşaldan preparatlar, həmçinin psixoloqla məsləhətləşmələr daxil olmaqla kompleks müalicə təyin olunur”, ‒ deyə həkim sözünü yekunlaşdırıb.