73 yaşlı Putinin əllərində şiş və göyərmə | Rusiya liderinin yeni görüntüləri gündəm oldu

Rusiya Prezidenti Vladimir Putinin qatıldığı tədbirdəki görüntüsü dünya gündəmində müzakirələrə səbəb olub.

Bu barədə “Newsweek” yazıb.

Mətbu orqanın məlumatına görə, V.Putin basketbol meydançasında tərəfdarları ilə görüş keçirib. 73 yaşlı liderin qatıldığı tədbirdə onun əlinin şişmiş, göyərmiş və damarları qabarmış vəziyyətdə olması diqqət çəkib.

İllərdir sağlamlığı ilə bağlı iddiaların mərkəzində olan Rusiya liderinin yumruqlarını sıxıb narahat göründüyü anlar sosial şəbəkələrdə “V.Putin xəstədirmi?” sualını yenidən gündəmə gətirib.

Ukrayna Daxili İşlər Nazirliyinin keçmiş müşaviri Anton Qeraşenko şəkilləri paylaşaraq bu sözləri yazıb:

“V.Putinin əllərində nəsə düz deyil. Damarlar qabarıb, şişib və narahat görünür. O, artıq dirsəklərinə qədər qan içindədir”.

Ukraynalı jurnalist Dmitri Qordon A.Qeraşenko ilə razılaşaraq V.Putinin əllərinin şişmiş, ağrılı və damarlarının gözəçarpan şəkildə qabardığını bildirib.

Ukrayna mediası görüntülərin xərçəngdən Parkinson xəstəliyinə qədər müxtəlif mümkün xəstəliklərin ehtimalını yenidən ortaya çıxardığını yazıb.