101 il əvvəl bu gün | Türkiyə Respublikasının qurulmasının ildönümüdür

Bu gün Türkiyə Cümhuriyyətinin qurulmasının 101 illiyidir.

1923-cü il oktyabrın 29-da Türkiyə Böyük Millət Məclisi Cümhuriyyəti elan edib.

2 il sonra – 1925-ci il bu günün türk dövlətinin yaranması günü kimi qeyd olunması barədə qanun qəbul olunub. Türkiyə Cümhuriyyətinin qurulması türk milləti və bu ölkənin varlığı uğrunda mübarizə aparanlar üçün böyük sınaqlar hesabına başa gəlib.

Türkiyə Cümhuriyyətinin yaradılması Birinci Dünya müharibəsindən sonra Osmanlı dövlətini parçalayıb məhv etmək istəyənlər üzərində qələbənin nəticəsidir.

Türkiyə Cümhuriyyətinin ərazisi 783 min kvadratkilometrdir. Hazırda Türkiyənin əhalisi 86 milyondan çoxdur. Ölkənin ilk prezidenti Mustafa Kamal Atatürk olub.

Hazırda qardaş ölkənin prezidenti Rəcəb Tayyib Ərdoğandır. Onun sədri olduğu Ədalət və İnkişaf Partiyası ilk dəfə 2002-ci ildə parlament seçkilərində qalib gəlib. Həmin dövrdən Türkiyənin hakim partiyasıdır.

Bu gün Türkiyə bir çox beynəlxalq təşkilatların, o cümlədən NATO-nun üzvü, dünyada əsas siyasi aktorlarından biridir.