14 illik araşdırmanın nəticələri heyrətə gətirdi

Amerika Ürək Assosiasiyasının jurnalında dərc olunmuş araşdırmaya görə, tənhalıq hissi degenerativ ürək qapağı xəstəliyinin inkişaf riskini artıra bilər.

Tədqiqatda 460 mindən çox yetkin iştirakçının məlumatları təhlil edilib. Onlar orta hesabla təxminən 14 il ərzində izlənilib.

Təcrübə iştirakçılarında ürək qapağı xəstəliyinin yeni halları – klapanların sərtləşməsi, normal qan axınının pozulması müşahidə olunub. Nəticələr göstərir ki, tənhalıq hissi keçirən insanlarda digərlərinə nisbətən risk 19 faiz daha yüksəkdir.

Tədqiqat müəllifləri vurğulayırlar ki, tənhalıq sadəcə emosional vəziyyət deyil, həm də fiziki sağlamlığa təsir edə biləcək amildir.

Müşahidələr zamanı məlum olub ki, tənhalıq yaşayanlarda yorğunluq, baş ağrısı, ürəkbulanma kimi əlamətlər yaranır.

Mütəxəssislər əmindirlər ki, bu vəziyyətin müalicəsi psixoloji gərginliyin aradan qaldırılması ilə yanaşı, ürək xəstəliyinin inkişafını yavaşlatmağa və cərrahi müdaxilələrə ehtiyacı azaltmağa kömək edə bilər.