185 km/s-dən 600 km/s-ə: Rusiyanın “qanadlı ölüm”ü müharibə meydanını necə dəyişir? - HƏRBİ XRONİKA

“Hərbi xronika”nın budəfəki buraxılışında İranın “Shahed-136” PUA-larından Rusiyanın yeni nəsil “Geran-4” və “Geran-5” dronlarına qədər baş verən texnoloji dəyişikliklər təhlil olunub.

Bildirilib ki, 2022-ci ildə Rusiyanın istifadə etməyə başladığı “Shahed-131” və “Shahed-136” PUA-ları əsasən ucuzluğu, uzaqmənzilliliyi və böyük sayda tətbiq oluna bilməsi ilə seçilirdi.

Sonrakı mərhələdə bu platformalar Rusiyada “Geran” adı altında təkmilləşdirilib, mühərrik, naviqasiya, rabitə və döyüş başlığı sistemlərində dəyişikliklər aparılıb. İstehsalın əsas mərkəzlərindən biri Tatarıstandakı Alabuqa xüsusi iqtisadi zonası olub.

Qeyd olunub ki, Rusiya PUA-ların radioelektron mübarizəyə davamlılığını və sürətini artırmaq üçün yeni texnologiyalara keçib. Əvvəlki “Geran” modellərindən fərqli olaraq reaktiv mühərriklə təchiz olunan “Geran-4” və “Geran-5” daha yüksək sürət imkanlarına malikdir.

Ukrayna kəşfiyyatının məlumatına görə, “Geran-5” Çin istehsalı “Telefly TF-TJ2000A” turbojet mühərriki ilə təchiz olunub, 450–600 km/saat sürətlə hərəkət edə və 950 kilometrədək məsafə qət edə bilir.

Bildirilib ki, “Geran” proqramında əsas dəyişikliklərdən biri baş verib: əvvəlcədən müəyyənləşdirilmiş koordinatlara uçan nisbətən sadə kamikadze PUA-sı daha mürəkkəb rabitə, naviqasiya və sensor sistemləri ilə təchiz olunan platformaya çevrilir.