2026-cı ilin sonlarında Ayda bu missiya həyata keçirilə bilər

NASA Yer kürəsinin təbii peyki olan Ayda yanğın təcrübəsi keçirməyi planlaşdırır.

"Ayda materialların alovlanma qabiliyyəti" adlandırılan missiyanın 2026-cı ilin sonlarına doğru həyata keçirilməsi nəzərdə tutulur.

Sınağın əsas məqsədi sadəcə alovlandırma deyil, Yer kürəsinin cazibə qüvvəsinin altıda birinə bərabər olan Ay şəraitində yanğın fizikasını öyrənməkdir.

NASA mütəxəssisləri bildirirlər ki, bu tədqiqatdan əldə ediləcək məlumatlar gələcəkdə Ayda yaradılacaq bazalarda yanğın təhlükəsizliyini təmin etmək üçün olduqca vacibdir.

Ayda cazibə qüvvəsi Yer kürəsindən altı dəfə zəif olduğu üçün bu şəraitdə alovun davranışı Yer kürəsindəkindən tamamilə fərqli olacaq ki, bu da daha ciddi təhlükə yarada bilər.

Təcrübə Ayın açıq səthində deyil, qapalı məkanda yəni stansiya daxilində aparılacaq. Çünki Ayda atmosfer olmadığı üçün açıq səthdə yanğın baş verməsi qeyri-mümkündür.

Mütəxəssislər ehtiyat edirlər ki, Ay şəraitində alovu söndürə biləcək güclü hava axını olmayacaq. Bunun əvəzinə, yanğını daim oksigenlə təmin edən zəif hava axını qalacaq. Bu isə xüsusi bir zona yaradır ki, bu zaman Yer kürəsində yanmayan və ya öz-özünə sönən materialların Ayda dəqiqələrlə yanması üçün ideal balans formalaşır.