“3 min il sonra ilk dəfə...” | Trampın xalqa müraciətində vacib mesajlar - Baku TV

ABŞ Prezidenti Donald Tramp xalqa müraciət edib.

O, çıxışında iqtisadi sahədə əldə etdiyi nailiyyətləri sadalamaqla kifayətlənib.

Problemlərdən söhbət açan lider nitqinə keçmiş prezident Co Baydenin administrasiyasını tənqid etməklə başlayıb:

“11 ay öncə mənə miras olaraq xaos qaldı və hazırda onu düzəltməyə çalışıram. Bir il əvvəl ölkəmiz demək olar ki, məhv olmuşdu. Biz tamamilə ölmüşdük. İndi isə dünyanın ən qaynar ölkəsiyik”.

D.Tramp 10 dəqiqədən artıq müddətdə Co Bayden administrasiyasını hədəf alaraq iqtisadi tənəzzül, artan cinayətkarlıq, miqrasiya böhranı və səhiyyə problemlərini demokratların idarəçiliyinin nəticəsi kimi təqdim edib.

Prezident ikinci dəfə hakimiyyətə gəlişindən sonra iqtisadi göstəricilərin yaxşılaşdığını vurğulayıb.

O, ölkəyə narkotik axınının azaldığını və Yaxın Şərqdə, xüsusilə Qəzzada münaqişənin sona çatmasında rolunu ön plana çıxarıb:

“Dünyanın ən güclü hərbi sistemi bizimdir. Mən Amerika qüvvələrini bərpa etdim, 3000 ildən sonra ilk dəfə yaxın Şərqə sülh gəldi, Qəzzada müharibəyə son qoydum”.

Siyasi analitiklər D.Trampın bu bəyanatlarını beynəlxalq ictimaiyyətə ünvanlanmış mesajdan daha çox daxili auditoriyaya hesablanmış çıxış kimi qiymətləndirir. Xüsusilə Konqresdə demokratlarla davam edən qarşıdurma və xarici siyasətə artan tənqidlər fonunda Prezident diqqəti iqtisadi göstəricilərə yönəltməyə çalışıb.

D.Tramp bildirib ki, prezidentliyi dövründə qiymətlərin endirilməsində əhəmiyyətli irəliləyişlər əldə edilib.

O, 11 ay ərzində ABŞ iqtisadiyyatına 18 trilyon dollar investisiya axını təmin etdiyini və tətbiq olunan rüsumların rolunu vurğulayıb:

“Bu uğurun böyük hissəsi rüsumlar vasitəsilə əldə edilib. Rüsumlar mənim ən sevdiyim sözdür”.