35 illik sirrə son | Bu nadir canlı alimləri necə mat qoydu?

Alimlər ilk dəfə "Mallomys istapantap", yəni subalp yunlu siçanı vəhşi təbiətdə canlı halda görüntüləməyi bacarıblar. Bu sirli gəmirici əvvəllər yalnız muzey eksponatlarından tanınırdı və 1989-cu ildən bəri cəmi bir dəfə müşahidə olunmuşdu.

Qeyd olunur ki, çexiyalı mütəxəssis Frantişek Veymelkanın rəhbərlik etdiyi ekspedisiya Papua-Yeni Qvineyanın Vilhelm dağına altı aylıq səfər edib. Yerli icmalarla əməkdaşlıq edən tədqiqatçılar 61 növ məməlini sənədləşdiriblər. Ən böyük sensasiya isə 3700 metr yüksəklikdə adı çəkilən siçanın tapılması olub.

Veymelka və onun komandası beş yetkin erkək gəmiricinin 1-1,5 kq arasında çəkidə olduğunu müəyyənləşdirib. Bu siçanların əsas qidası isə paporotniklərdir.

Maraqlıdır ki, bu nadir növdə daha əvvəl heç vaxt qeyd olunmayan bir xüsusiyyət ‒ sinə hissəsində güclü qırmızımtıl-qəhvəyi rəng müşahidə edilib.