46 bank hesabı açıb dələduzluq edən şəxs necə ifşa olundu?

Niderlandda 34 yaşlı Amsterdam sakini bankların rəqəmsal şəxsiyyət yoxlama sistemlərini dipfeyk texnologiyası ilə aldadaraq 46 bank hesabı açmaqda ittiham olunur.

Yerli polis şübhəlinin saxta biometrik görüntülərdən istifadə etməklə başqalarının adına hesablar yaratdığını və bu hesabları fırıldaqçılıq məqsədilə dövriyyəyə buraxdığını açıqlayıb.

İstintaq materiallarına əsasən, şübhəli xüsusilə kirayə ev axtaran şəxsləri hədəf seçib. O, potensial kirayəçilərə guya münasib mənzillər təklif edib, daha sonra isə “sənədləşmə üçün” şəxsi sənədlərin göndərilməsini istəyib. Əldə etdiyi sənədlər əsasında bank kartları sifariş edən şəxs fotoları dipfeyk vasitəsilə dəyişdirib, üz cizgilərini öz biometrik göstəricilərinə uyğunlaşdıraraq onlayn verifikasiyadan keçib.

Dələduzluq sxemi noyabrın sonlarında təsadüfən ifşa olunub. Sərhəd nəzarəti zamanı həmin şəxsin üzərindən həddən artıq çox bank kartı aşkar edilib. Bu fakt hüquq-mühafizə orqanlarının diqqətini çəkib və daha sonra genişmiqyaslı araşdırmaya start verilib.