75 mindən çox hüceyrə araşdırıldı

Piylənmənin qanda şəkərin yüksək səviyyəsini müəyyən edən beyin mexanizmini sıradan çıxara bildiyi müəyyənləşib.

Danimarkalı alimlərin rəhbərlik etdiyi beynəlxalq tədqiqat qrupu yağlı qidaların neyronların fəaliyyətinə təsirini araşdırıb. Alimlər sınaqlar zamanı 75 mindən çox siçanın beyin hüceyrəsini təhlil ediblər.

Tədqiqat zamanı məlum olub ki, normal qidalanan gəmiricilərdə qanda qlükozanın səviyyəsi yüksəldikdə böyümə hormonu istehsal edən neyronların fəaliyyəti azalır. Bu zaman beyin qidalanmasını təmin edən hüceyrələr də müdafiə mexanizmini işə salır. Lakin səkkiz həftə yağlı qidalarla bəslənən siçanlarda vəziyyət tamamilə dəyişib. Beyin yüksək şəkər səviyyəsinə ya ümumiyyətlə reaksiya verməyib, ya da böyümə hormonunun istehsalını artırıb.

Tədqiqatçılar hesab edirlər ki, bu, sinir sisteminin metabolik çevikliyini itirməsi ilə nəticələnir. Araşdırmalarla həmçinin insanlarda qlükoza göstəriciləri ilə əlaqəli genetik fərqlərin məhz bu neyronlarda fəaliyyət göstərən genlərin ətrafında toplandığı müəyyən edilib.

Alimlərin fikrincə, gələcəkdə həmin neyronların həssaslığının bərpa edilməsi piylənmə və ya 2-ci tip diabetin müalicəsində yeni yanaşmaların yaranmasına səbəb ola bilər.