ABŞ-də 100 il əvvəl yoxa çıxan gəmi gün üzü gördü | Tapıntı barədə maraqlı məlumatlar

ABŞ-nin San-Dieqo şəhəri yaxınlığındakı dəniz dibindən bir əsrdən çox əvvəl yoxa çıxmış hərbi sualtı qayıq və təlim təyyarəsinin qalıqları aşkar edilib.

Tapıntılar həm tarix, həm də dərin dəniz tədqiqatları baxımından böyük əhəmiyyət kəsb edir.

Dəniz dibi insanların dalış dərinliyindən çox aşağıda olduğundan tədqiqat Alvin adlı idarə olunan insanlı sualtı aparat və "Sentry" adlı avtonom sualtı cihaz vasitəsilə həyata keçirilib.

ABŞ Hərbi Dəniz Qüvvələrinə məxsus "USS F-1" 1917-ci ildə keçirilən təlim zamanı baş verən toqquşma nəticəsində batıb. Gəminin göyərtəsində olan 22 nəfərdən yalnız 3-ü sağ qalıb. Qalan 19 ekipaj üzvü həlak olub.

Qayıq 100 ildən çox suda qalmasına baxmayaraq, heyrətamiz dərəcədə bütöv və salamat vəziyyətdədir.

Həmin ərazidə 1950-ci ildə qəzaya uğramış "Grumman TBF Avenger" təlim təyyarəsinin qalıqları da aşkar olunub.