ABŞ-də aləm bir-birinə dəydi | Ölkə etirazlarla silkələnir

Amerika Birləşmiş Ştatlarında 3 gündür küçə etirazları səngimək bilmir.

“İmmiqrantlarsız gün” adı altında davam edən piketlər səbəbi ilə Los-Ancelesin mərkəzində nəqliyyatın hərəkəti məhdudlaşdırılıb.

Aksiya iştirakçıları D.Trampın miqrantlara qarşı irəli sürdüyü deportasiya siyasətinə qarşı çıxıblar. Onlar meksikalılara dəstək nümayiş etdirərək əllərində Meksika bayraqları ilə şüarlar səsləndiriblər.

Polis hərəkatın genişlənməsinin qarşısını almaq niyyəti ilə canlı sədd quraraq göz yaşardıcı qazdan istifadə edib. Hüquq-mühafizə orqanlarının əməkdaşları əhaliyə qeyd olunan magistral yollardan istifadə etməməyi tövsiyə edib. Yollarda hərəkət bərpa olunana qədər tıxacların yaşana biləcəyini nəzərə almalarını bildirib.

Sözügedən etiraz aksiyalarına fərdi sahibkarlar da dəstək verərək işçilərini ödənişli məzuniyyətə buraxıblar.

Xatırladaq ki, Prezident postuna keçən Donald Trampın ilk imzaladığı fərmanlardan biri ölkəyə qanunsuz daxil olan miqrantların deportasiyası ilə bağlı olub. Etiraz dalğası Amerikanın bir neçə ştatına, o cümlədən Cənubi Karolinaya da sıçrayıb.