ABŞ İrandakı vətəndaşlarını ölkəni tərk etməyə çağırıb - Baku TV

ABŞ Dövlət Departamenti İrandakı Amerika vətəndaşlarına təcili xəbərdarlıq edib.

Xəbərdarlıqda onları Ermənistan və Türkiyə ilə quru sərhədlərdən keçərək ölkəni tərk etməyi düşünməyə çağırıb.

Xəbərdarlıq kütləvi etirazlar və nümayişlərin zorakılıqla yatırılması fonunda "ABŞ-nin İrandakı virtual səfirliyi"nin saytında yerləşdirilib. Gedə bilməyən amerikalılara evlərində və ya başqa təhlükəsiz binada təhlükəsiz yer axtarmaq, qida, su, dərman və digər zəruri ləvazimatlarla ehtiyat görmək tövsiyə olunur.

Dövlət Departamenti həmçinin ABŞ vətəndaşlarına diqqətdən kənarda olmağı, nümayişlərin keçirildiyi ərazilərdən uzaq durmağı və ABŞ hökumətinin köməyindən asılı olmayan təcili plana sahib olmağı tövsiyə edir. İran üçün 4-cü səviyyəli səyahət xəbərdarlığı – "səyahət etməmək" qüvvədədir.

Bildirilib ki, Tehrandakı İsveçrə səfirliyi ABŞ-nin İrandakı maraqlarını təmsil edir və həmçinin Amerika vətəndaşlarına təcili xidmətlər göstərir.

Bu arada, ABŞ Prezidenti Donald Tramp İranla əməkdaşlıq edən bütün ölkələrə 25% rüsum tətbiq olunduğunu elan edib. O, bununla bağlı "Truth Social"da paylaşıb.

"İran İslam Respublikası ilə əməkdaşlıq edən istənilən ölkə ABŞ ilə bütün növ sövdələşmələr üçün 25% rüsum ödəyəcək", – deyə paylaşımda qeyd olunub. Tramp qərarın dərhal qüvvəyə mindiyini və yenidən baxılmayacağını vurğulayıb.