ABŞ-nin neft və qaz müqavilələri İrana görə iflic oldu

Yaxın Şərqdəki münaqişə səbəbindən enerji qiymətlərinin kəskin artmasının yaratdığı bazar qeyri-müəyyənliyi fonunda ABŞ-də neft və qaz sövdələşmələri faktiki olaraq dayanıb.

Bu barədə "The Financial Times" qəzeti bankirlərə və hüquqşünaslara istinadən məlumat yayıb.

Qeyd olunub ki, bu sahədə bütün danışıqlar bazarlar sakitləşənə və əmtəə qiymətləri sabitləşənə qədər yavaşlayıb və ya dayandırılıb.

"İki ticarət müqaviləm, uzunmüddətli müqavilələrim var, amma hazırda hər şey iflic vəziyyətdədir. Çünki heç kim heç nəyə qiymət qoya bilmir", – deyə "Vinson ənd Elkins" hüquq firmasının ortağı Brayan Luk nəşrə bildirib.

Enerji məsələləri ilə məşğul olan yüksəkvəzifəli London bankirlərindən biri qeyd edib ki, hazırda üç və ya dörd satış prosesi var və hamısını dayandırıb. "Təklifləri qəbul etməyin mənası yoxdur, çünki onlar çox fərqli olacaq", – deyə bankir izah edib.

Həmçinin bildirib ki, 23-27 mart tarixlərində Texasın Hyuston şəhərində keçirilməsi planlaşdırılan illik "CERAWeek" enerji konfransı bu il çox qeyri-adi olacaq.