ABŞ Ordusu üçün ən böyük zərbə | “Bu qədər pilotsuz təyyarənin məhv edilməsi...”

Yəmən husiləri son altı həftə ərzində ümumi dəyəri 200 milyon dollar olan 7 ABŞ “Raeper” pilotsuz təyyarəsini vurublar.

Bu da husilərə qarşı əməliyyatlar zamanı ABŞ Ordusu üçün ən böyük itkilərdən biridir.

Bu barədə “Associated Press” agentliyi ABŞ Müdafiə Nazirliyindəki mənbələrə istinadla məlumat yayıb. 

Rəsmilər keçən həftə 3 Amerika pilotsuz təyyarəsinin vurulduğunu bildiriblər. Qeyd olunur ki, hazırkı şəraitdə hava əməliyyatının genişləndirilməsi ABŞ Hərbi Hava Qüvvələrinin texnikaları üçün riskləri artıra bilər.

Mənbələrə görə, bu qədər pilotsuz təyyarənin məhv edilməsi husilərin Amerikanın zərbələrinə qarşı mübarizə üsullarını təkmilləşdirdiyini göstərir. Həmçinin rəsmilər “Ənsar Allah”a qarşı əməliyyatların uğurla davam etdiyinə əmindirlər.

Pentaqon bundan əvvəl husilərin komanda məntəqələrinə, silah anbarlarına və istehsal sahələrinə, hava hücumundan müdafiə mövqelərinə və şəxsi heyətin cəmləşdiyi ərazilərə ümumilikdə 800 zərbə endirildiyini açıqlamışdı.