ABŞ uzaqmənzilli raketlərin qadağan edilməsini istəyir

"ABŞ İranla bağlanan yekun razılaşmaya digər ölkələr üçün təhlükə yarada biləcək raketlərin hazırlanmasına qadağa qoyulmasını da daxil etmək niyyətindədir".

Bunu ABŞ-nin vitse-prezidenti Cey Di Vens Ağ Evdə keçirilən mətbuat konfransında bildirib.

"Biz onların xeyli sayda ballistik raketlərini və buraxılış qurğularını məhv etmişik. Onların dünya üçün geniş təhlükə yarada biləcək raketlər hazırlaya bilməyəcəklərini ümid edirik", – deyə o qeyd edib.

Vensin sözlərinə görə, ABŞ İrandan özünümüdafiə hüququndan tamamilə imtina etməsini tələb etmir. Lakin Vaşinqton Tehranın nüvə potensialını bərpa edə bilməməsini təmin etmək niyyətindədir.

ABŞ-nin vitse-prezidenti İranın nüvə proqramının məhv edildiyini və hazırda əsas məqsədin ölkənin gələcəkdə bu imkanları bərpa etməsinin qarşısını almaq olduğunu iddia edib.

Cey Di Vens əlavə edib ki, ABŞ faktiki olaraq İran dəniz limanlarının blokadasını aradan qaldırıb və Tehran ticarət gəmilərinin Hörmüz boğazından keçməsinə icazə verməyə başlayıb:

"ABŞ Mərkəzi Komandanlığı ondan çox gəminin dəniz blokadasından keçməsinə icazə verib. Beləliklə, biz də razılaşmanın öz payımıza düşən hissəsini yerinə yetiririk".

Vens bundan başqa ABŞ-nin iran yaxınlığında hərbi mövcudluğunun azaldılmasının da razılaşmanın bir hissəsi olduğunu bildirib.

"Bu, yekun razılaşmadır. Bu halda, qoşunlarımızın səviyyəsini də münaqişədən əvvəlki səviyyəyə endirəcəyik. Yəni orada əlavə aviadaşıyıcı zərbə qrupları saxlamayacağıq", – deyə Cey Di Vens vurğulayıb.