ABŞ və Ukrayna arasında imzalanan faydalı qazıntılar sazişinin hər iki ölkəyə əhəmiyyəti

ABŞ və Ukrayna arasında imzalanan faydalı qazıntılar sazişi hər iki ölkəyə əhəmiyyətli fayda gətirmək potensialına malikdir.

Bu barədə “The New York Times” yazır.

Məqalə müəllifi qeyd edir ki, hazırda müqavilənin praktikada necə işləyəcəyi tam aydın deyil və ondan əldə olunan gəlirlər yalnız uzun illərdən sonra bilinəcək. Sənəd Ukrayna üçün heç bir təhlükəsizlik zəmanəti verməsə də, Donald Trampın istədiyi kimi, Kiyevi yüz milyardlarla dollar borclandırmır.

Ekspertlərə görə, burada ən önəmlisi odur ki, saziş Prezident Donald Trampı Ukraynanın gələcəyi ilə əlaqələndirir.

“O, biznesmendir, həmişə hesablamalar aparır. Onun işgüzar zehniyyəti siyasətə yanaşmasını formalaşdırır. Ona görə də D.Trampın sövdələşmədəki motivasiyası ABŞ-nin Ukraynaya marağını qorumağa kömək edə bilər. Bunun praktikada necə işləyəcəyini zaman göstərəcək”, – ukraynalı politoloq Vladimir Fesenko bildirib.

“The New York Times”ın məlumatına görə, Ukrayna bununla hər şeyi yox, istədiyinin bir hissəsini ala bilib. Əlamətdar çatışmazlıq aydın təhlükəsizlik zəmanətlərinin olmamasıdır. Bununla belə, Ukrayna üçün faydalı qazıntı sazişinin özü müəyyən təsir əldə etmək imkanı verir.

D.Tramp hesab edir ki, ABŞ ilə birgə investisiya fondu özlüyündə təhlükəsizliyin təminatıdır. Amerika şirkətləri və Ağ Evin Ukraynanın gələcəyinə sərmayə qoyması Rusiyanı hansısa yolla yeni hücumdan çəkindirəcək.