Aİ-dən üzv dövlətlərə dəstək vədi

Avropa Komissiyasının sədri Ursula fon der Leyen Rusiya qırıcılarının Estoniyanın hava məkanını pozması ilə bağlı insident fonunda Tallinə dəstəyini ifadə edib.

“Biz hər bir təxribata qətiyyətlə cavab verəcəyik, eyni zamanda şərq cinahımızın möhkəmlənməsinə sərmayə qoyacağıq. Təhdidlər gücləndikcə, təzyiqlərimiz də artacaq”, – deyə Fon der Leyen qeyd edib.

O həmçinin Avropa İttifaqı liderlərini 19-cu sanksiyalar paketinin təsdiqini sürətləndirməyə çağırıb.

“Rusiya hərbi təyyarələrinin Estoniyanın hava məkanını pozması son dərəcə təhlükəli təxribatdır”.

Bunu isə Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas söyləyib. Diplomat Estoniya hökuməti ilə təmasda olduğunu bildirib və üzv dövlətlərə Avropa İttifaqının dəstəyini vəd edib.

“Biz üzv dövlətlərimizin müdafiəsini Avropa resursları ilə gücləndirməkdə davam etdirəcəyik. Putin Qərbin səbrini sınayır. Biz bu barədə zəiflik göstərməməliyik”, – deyə Avropa diplomatiyasının rəhbəri əlavə edib.