Alimlərdən fəlakət xəbərdarlığı | Bəşəriyyəti gözləyən təhlükə nədir?

Yer planeti Günəş sistemindən "çıxarıla" bilər.

Yeni astronomik araşdırmalara görə, buna səbəb "uçub gələn" ulduzun gözlənilməz hərəkət trayektoriyası ola bilər.

Baxmayaraq ki, bu ssenari milyardlarla il ərzində inkişaf edəcək, alimlər indidən bu cür kosmik "qonaqların" planetlərin orbitlərinə nə qədər təsir edə biləcəyini modelləşdirirlər. Hesablamaların nəticələri isə narahatlıq doğurur.

"Icarus" elmi jurnalında dərc olunan yeni tədqiqatda NASA-nın "Horizons" sistemi üzərindən 2000 simulyasiya aparılıb. Alimlər Günəş sisteminin yaxınlığından keçən ulduzları modellərə daxil edərək, bu keçidlərin sistemin sabitliyini təxminən 50% azalda biləcəyini müəyyən ediblər.

Qeyd olunur ki, bu qeyri-sabitlik planetlər arasında bərabər paylanmır – bəziləri daha həssasdır. Yer planeti bu modellərdə nisbətən sabit qalsa da, digər planetlərin orbitləri pozularsa və Yerin trayektoriyasına təsir edərsə, onun da Günəş sistemindən atılması ehtimalı yaranır.

Bu cür hadisələr yalnız beş milyard il sonra baş verə bilər. Lakin bu tədqiqat bizim kosmosdakı varlığımızın nə qədər həssas olduğunu bir daha xatırladır.