Alimlərdən qlobal elektrik kəsintisi ilə bağlı xəbərdarlıq

26 may 2025 420 baxış

Alimlər Günəşdə baş verən güclü partlayışlar səbəbi ilə Yer kürəsində irimiqyaslı elektrik kəsintisi, yəni "blekaut" təhlükəsi barədə xəbərdarlıq ediblər.

Qeyd olunur ki, Günəşdə baş verən güclü alov püskürmələri nəticəsində Yerə doğru yüksəkenerjili kosmik radiasiya fırtınası yaxınlaşır. Bu radiasiya fırtınası telekommunikasiya sistemlərinə, elektrik şəbəkələrinə və peyk texnologiyalarına ciddi zərər vura bilər.

14 may tarixində qeydə alınan partlayış artıq Avropa, Asiya və Yaxın Şərqdə rabitə sistemlərinin sıradan çıxmasına, eləcə də ABŞ-nin şərq hissəsində elektrik təchizatında fasilələrə səbəb olub.

Hazırda NASA və digər kosmik agentliklər yaxın günlərdə yeni Günəş radiasiyası boşalmalarının baş verəcəyi barədə xəbərdarlıq edir.

Alimlər bu cür kataklizmlərə qarşı müdafiə strategiyalarının təcili hazırlanmasını və Günəşin aktivliyini izləmək üçün peyk müşahidələrinin genişləndirilməsini vacib sayır.

#Yer kürəsi