Alyans Arktikanın təhlükəsizliyi üçün missiyaya başlayır

NATO-nun Əməliyyatlar üzrə Birgə Qüvvələr Komandanlığı Arktika və Uzaq Şimalda müttəfiqlərin hərbi mövcudluğunun koordinasiyasına və gücləndirilməsinə yönəlmiş "Arctic Sentry" missiyasının başladığını elan edib.

"Rusiyanın artan hərbi fəaliyyəti və Çinin şimal bölgəsinə artan marağı qarşısında daha çox iş görməyimiz vacib idi. Məhz buna görə də "Arctic Sentry"ni işə saldıq. Bu, NATO və müttəfiqlərinin şimal bölgəsindəki fəaliyyətlərini bölgəyə vahid əməliyyat yanaşmasında bir araya gətirərək alyansın gücündən istifadə edir", – deyə NATO-nun Baş katibi Mark Rutte bildirib.

Alyansın Baş katibinin sözlərinə görə, missiyaya onminlərlə personal və avadanlıq cəlb edilir ki, bu da NATO-nun Arktika  və bütün alyansın təhlükəsizliyini təmin etmək öhdəliyini aydın şəkildə göstərir:

"Əslində burada yeni olan odur ki, artıq ilk dəfə olaraq Arktikada gördüyümüz bütün işləri vahid komandanlıq altında birləşdirəcəyik. Bununla da biz yalnız gördüyümüz işləri daha səmərəli şəkildə əlaqələndirib təsirini artırmaqla kifayətlənməyəcəyik. Eyni zamanda hansı boşluqların mövcud olduğunu müəyyənləşdirəcəyik və onları dolduracağıq".

Bir sözlə, yeni missiya NATO ölkələrinin regionda artan fəaliyyətlərini vahid əməliyyat konsepsiyasında birləşdirəcək.