Aviabazalar barədə məlumat toplayan casuslar zərərsizləşdirilib

Ukrayna Təhlükəsizlik Xidməti Rusiya Baş Kəşfiyyat İdarəsinin 14 nəfərdən ibarət olduğu bildirilən agent şəbəkəsini zərərsizləşdirib.

Bu barədə Ukrayna Təhlükəsizlik Xidməti məlumat yayıb.

Açıqlamaya görə, şəbəkənin əsas fəaliyyəti ölkədə yerləşən hərbi aviasiya obyektləri ilə bağlı kəşfiyyat məlumatlarının toplanması olub.

Qeyd olunub ki, agentlər F-16 və “Miraj 2000” qırıcılarının yerləşdirildiyi Ukrayna aviabazaları barədə informasiya əldə etməyə çalışıblar. Şəbəkə üzvlərinin hərbi təyyarələrin, hərbi qulluqçuların və aerodromların fotoşəkillərini çəkdiyi bildirilir.

Bundan başqa, agentlərin təyyarələrin havaya qalxma və enmə vaxtlarını da izlədiyi vurğulanıb. Daha sonra toplanan faktlar Rusiya kəşfiyyatına ötürülüb.

Əməliyyat nəticəsində şəbəkənin 14 üzvünün saxlanıldığı açıqlanıb. Onların arasında Ukrayna Silahlı Qüvvələrinin hərbçisinin də olduğu qeyd edilir.

Şəbəkə üzvlərinə qarşı hansı hüquqi ittihamların irəli sürüldüyü və araşdırmanın hansı mərhələdə olduğu barədə açıqlama verilməyib. Rusiya tərəfi məsələ ilə bağlı hər hansı mövqe bildirmyib.