Avropa bu il külək enerjisində rekord həddə yaxınlaşa bilər

Avropa bu il yeni külək turbinlərinin quraşdırılması üzrə rekord göstəriciyə nail ola bilər.

“WindEurope” təşkilatının yarımillik hesabatına əsasən, ilin ilk altı ayında Avropada külək enerjisinin gücü 8,8 giqavat artıb. Bu göstərici 2024-cü ilin eyni dövrü ilə müqayisədə 30 faiz çoxdur.

Quraşdırılan turbinlərin istehsal etdiyi enerji təxminən 7 milyon Avropa ailəsinin elektrik tələbatını ödəyə bilər. Həmçinin bu gücün ildə 25 LNG tankerinə bərabər həcmdə fosil yanacaq idxalını əvəz edə biləcəyi bildirilir.

Almaniya ilin ilk yarısında artımın əsas hərəkətverici qüvvəsi olub. Ölkədə 3,4 giqavat, yəni Avropada quraşdırılan yeni gücün 40 faizi yaradılıb və 500-dən çox turbin istismara verilib.

Belçikada isə külək enerjisi gücü daha 60 meqavat artıb. “WindEurope” il ərzində Avropada əlavə 24 giqavat gücün yaradılacağını proqnozlaşdırır.

Bununla belə, icazələrin alınması hələ də əsas maneə olaraq qalır. Təşkilat 2030-cu ildə illik artımın 30 giqavata çatacağını gözləyir.