Ölkədə külək enerjisi istehsalında gözlənilməz dərəcədə böyük artım qeydə alınıb - Baku TV

Azərbaycanda külək enerjisi istehsalı 23 dəfəyə yaxın artıb. Bu ilin yanvar-iyun aylarında Azərbaycanda külək elektrik stansiyalarında (KES) 499,9 milyon kVt-saat elektrik enerjisi istehsal edilib.

Bu barədə Dövlət Statistika Komitəsinin hesabatında bildirilib.

Məlumata görə, bu, 2025-ci ilin eyni dövründəki göstərici ilə müqayisədə 478,1 milyon kVt-saat və ya 22,9 dəfə çoxdur.

Eyni zamanda hesabat dövründə ölkədə günəş elektrik stansiyalarında 256,4 milyon kVt-saat elektrik enerjisi istehsal edilib ki, bu da 2025-ci ilin ilk altı ayındakı göstərici ilə müqayisədə 2,1 milyon kVt-saat və yaxud 0,8% azalma deməkdir.

Bundan başqa, bu ilin ilk yarısında ölkədə istilik elektrik stansiyalarında (İES) 9,414 milyard kVt-saat elektrik enerjisi istehsal edilib. Bu isə ötən ilin eyni dövrü ilə müqayisədə 969,7 milyon kVt-saat və ya 9,3% azdır.

Hesabat dövründə Azərbaycanda su elektrik stansiyalarında (SES) 1,874 milyard kVt-saat elektrik enerjisi istehsal edilib ki, bu da illik müqayisədə 31 milyon kVt-saat və ya 1,7% artım deməkdir.

Qeyd edək ki, Azərbaycanda elektrik enerjisi, qaz və buxar istehsalı, bölüşdürülməsi və təchizatı sektorunda 2026-сı ilin yanvar-iyun aylarında 1 milyard 803,8 milyon manat dəyərində məhsul istehsal olunub və xidmətlər göstərilib. Su təchizatı, tullantıların təmizlənməsi və emalı sektorunda istehsal edilmiş məhsulların həcmi 318 milyon manat təşkil edib.

Azərbaycan elektrik enerjisi istehsalının artırılması və enerji sisteminin şaxələndirilməsi istiqamətində genişmiqyaslı layihələr həyata keçirir. Xüsusilə bərpaolunan enerji mənbələrinin inkişafı dövlətin enerji strategiyasının əsas prioritetlərindən biridir.

Hazırda ölkədə bp, “Masdar”, “ACWA Power”, “China Gezhouba Group Overseas Investment”, “SOCAR Green” və digər tərəfdaşlarla günəş və külək elektrik stansiyalarının tikintisi üzrə iri investisiya layihələri icra olunur.