Avropalı ekspertdən Ukrayna ilə bağlı qorxunc proqnoz

2 ildən çoxdur Ukraynada davam edən genişmiqyaslı müharibə getdikcə daha çox dağıntılara və insan tələfatına səbəb olur. Hər gün yayılan xəbərlərdə Ukraynaya dünyanın yardımının getdikcə azalması, bunun fonunda döyüşlərin şiddətlənməsi vəziyyəti daha da mürəkkəbləşirib.

Slovakiyalı ekspert Jozef Hrabina Baku TV-nin Şərqi Avropa bürosuna müharibənin uzanacağını və uzandıqca daha geniş platformaya keçərək Şərqi Avropaya böyük zərər verəcəyini bildirib.

“Hazırda bütün göstəricilər müharibənin qalıcı olduğunu göstərir. Biz görürük ki, Rusiya hazırda istər hərbi sənayedə, istər hərbi xidmətdə, istər səfərbərlikdə, istərsə də iqtisadiyyatda genişmiqyaslı müharibəni davam etdirməyə yönəlmiş uzunmüddətli siyasət aparır. Ölkənin hərbi-sənaye kompleksi fasiləsiz çalışır. Rusiyanın bu gün cəbhə xətti boyunca davam etdirdiyi hazırkı əməliyyat tempi münaqişənin başlanmasından bəri ən yüksək səviyyəlidir.

Digər tərəfdən, Qərb müttəfiqləri Ukraynaya bacardıqları qədər dəstək verməyə çalışırlar. Biz koalisiyanın, Fransanın Ukraynanın Belarusla şimal sərhədinin təhlükəsizliyini təmin etmək səylərini görürük. Məqsəd Ukraynanın öz qoşunlarını cənub və şərqdə, əsasən də Rusiyanın əməliyyatlarının genişləndiyi Donetsk bölgəsində yerləşdirə bilməsinə şərait yaratmaqdır.

Bu qərarlarla biz görürük ki, Avropa və NATO müttəfiqləri arasında müxtəlif yanaşmalar var və bu vəziyyəti necə həll etməklə bağlı aralarında fikir ayrılığı olsa da, Qərb Ukraynaya uzunmüddətli dəstək göstərmək niyyətindədir. Buna baxmayaraq, görünür ki, Ukraynaya dəstək bir növ Fransa və Polşa kimi ayrı-ayrı aktorların fərdi səylərinə və fərdi siyasətlərinə əsaslanacaq.

Bir müddət sonra Böyük Britaniyadan və bəlkə də ABŞ-dən nəsə gözləyə bilərik. Qərb ölkələrinin artan iştirakı ilə eskalasiyanın daha da yükəlməsi ehtimaları reallığa çevrilir və biz görürük ki, bu müharibə tərəflərindən heç biri sülh danışıqlarına hazır deyil”, – o əlavə edib.

Qeyd edək ki, Ukrayna cəbhəsində müvəqqəti sakitlikdən sonra yenidən aktiv əməliyyatlara start verilib. Ukrayna Xarkov və Donetsk vilayətləri istiqamətində ciddi itkilərə məruz qalır.