Bağırsaq xərçənginə səbəb olan amillər

Hər il təxminən 1,4 milyon insana bağırsaq xərçəngi diaqnozu qoyulur və 500 min nəfər bu xəstəlikdən dünyasını dəyişir.

Xəstəliyin erkən aşkarlanması isə ölüm riskini xeyli dərəcədə azaldır.

Bağırsaq xərçənginin yaranmasına səbəb olan bir sıra amillər var ki, bunu da rusiyalı onkoloq Aleksandr Qriqoryev "Lenta.ru" nəşrinə müsahibəsində danışıb və bağırsaq sağlamlığının əsas düşmənlərini sadalayıb.

"Siqaret çəkən şəxslərdə bağırsaq xərçəngi riski daha yüksəkdir. Çünki onlar hər siqaret və ya veyp istifadəsi zamanı orqanizmə çox miqdarda kanserogen maddə qəbul edirlər. Alkoqolun da bağırsaqda şiş proseslərinə səbəb olma ehtimalı tütün məmulatları qədər yüksəkdir", – deyə Aleksandr Qriqoryev bildirib.

Onkoloqun sözlərinə görə, xərçəngin yaranmasına təkan verən digər amillər xroniki babasil, anal çatları, iltihabi proseslər və bağırsaq polipləridir.

Qriqoryev izah edib ki, böyüməyə və bədxassəli törəmələrə çevrilməyə meylli olan poliplər xüsusilə təhlükəlidir.

Həkim həmçinin az hərəkətli həyat tərzini və artıq çəkini də ciddi risk faktorları kimi göstərib. Bu amillər bağırsaq əzələlərini zəiflədir, metabolizmi ləngidir və xərçəngin inkişafı ilə sıx əlaqəli olan müxtəlif proktoloji xəstəliklərin yaranmasına zəmin hazırlayır.