“Başqa ölkələr də hərəkətə keçəcək!” - Tramp mübahisəli çıxışı ilə gündəmi silkələdi

ABŞ Prezidenti Donald Tramp Qəzza zolağında baş verən humanitar böhranla bağlı mübahisəli açıqlamalar verib.

O, Qəzzaya ettikləri maddi yardımlardan söz açaraq deyib: “Qəzzaya çoxlu pul verdik, amma heç kim bizə təşəkkür etmədi”.

Tramp televiziyada izlədiyi görüntülərə münasibət bildirərək bölgədəki dəhşətli humanitar vəziyyətə diqqət çəkib.

“Televiziyada gördüyüm qədəri ilə uşaqlar çox ac görünür. Onların dərhal qida və təhlükəsizliyə çıxışı lazımdır. Digər ölkələr də hərəkətə keçməli olacaqlar”, ‒ o söyləyib.

ABŞ lideri HƏMAS tərəfindən saxlanılan girovlardan da danışıb: “HƏMAS-ın bir neçə girovla sağ qalacağını düşünmürəm. Onlar canlı qalxanlardır”.

ABŞ Prezidenti ötən həftə baş tutmayan atəşkəs danışıqlarından sonra İsrailin Baş naziri Benyamin Netanyahuya fərqli yanaşma təklif etdiyini bəyan edib.

Öz liderliyi haqqında da iddialı açıqlamalar verən Tramp “Mən olmasaydım, hazırda dünyada 6 böyük müharibə olacaqdı” deyərək qlobal münaqişələrin qarşısının alınmasında mühüm rol oynadığını bildirib.

Qeyd edək ki, Fələstin rəsmiləri bildiriblər ki, Qəzzada aclıqdan ölənlərin sayı hər gün artmaqdadır. İndiyə kimi 147 nəfər, o cümlədən 88 uşaq ölüb.