Bayden debatdan sonra prezidentlikdən əl çəkdi? | Ağ Evdən açıqlama

Amerika Birləşmiş Ştatları Prezidenti Cozef Bayden sabiq ölkə başçısı Donald Trampla keçirdiyi debatda müzakirələrə səbəb olan çıxışı ilə bağlı açıqlama verib.

O, qarşılaşmada yol verdiyi səhvləri gərgin səyahət cədvəli ilə əlaqələndirib. Hətta “Mən çox da ağıllı hərəkət etməmişəm, səhnədə olarkən az qalırdı ki, yuxuya gedim” açıqlaması ilə diqqətləri yenidən üzərinə çəkib.

Ağ Evin mətbuat katibi Karin Jan-Pyer isə C.Baydeni dəstəkləyərək ölkə rəhbərinin cavan olmadığını və əvvəlki illə müqayisədə indi daha yaxşı vəziyyətdə olduğunu açıqlayıb:

“Onu deyə bilərəm ki, həmin gecə çox pis bir gecə idi. Prezident də bununla bağlı açıqlama verib və debatın yaxşı keçmədiyini özü də başa düşür. Mən bundan artıq sizə heç nə deyə bilmərəm. Ölkə başçısı barəsində illik dərc olunan sağlamlıq məlumatları və hesabatlar var. Biz bunu həyata keçirməyə davam edəcəyik. Əlimizdə bundan başqa informasiya yoxdur.

Onu da qeyd edim ki, tibbi heyətin bizə verdiyi məlumata görə, ölkə rəhbərinin koqnitiv, yəni əqli testə ehtiyacı yoxdur. Bu, hazırda vacib deyil. Amma sözsüz ki, sizi başa düşürük. Ortaya çıxan mənzərə pis idi. Bildirmək istəyirəm ki, Prezident öz fəaliyyətini əvvəl olduğu kimi davam etdirəcək”.