Belçika dondurulmuş Rusiya aktivləri üçün israr edir?

Ukrayna Prezidenti Volodimir Zelenski Brüsseldə Avropa İttifaqı liderlərinin sammitində iştirak edəcək.

Bu barədə "Bloomberg" məlumat yayıb.

Məqalədə qeyd olunub ki, Aİ liderləri bir neçə həftədir Ukraynanın maliyyə ehtiyatlarının sürətlə tükənməsini nəzərə alaraq, kredit şərtlərini razılaşdırmağa çalışırlar. Lakin danışıqlar Rusiya Mərkəzi Bankının dondurulmuş aktivlərinin əksəriyyətinin yerləşdiyi Belçika tərəfindən ciddi müqavimətlə qarşılaşır.

Məsələyə münasibət bildirən Macarıstanın Baş naziri Viktor Orbanın sözlərinə görə, Rusiyanın dondurulmuş maliyyə aktivlərinin müsadirəsi məsələsi Avropa İttifaqı liderlərinin sammitində müzakirə olunmayacaq.

Bu arada, Ukrayna ilə Almaniya arasında hərbi sahədə yeni razılaşmalar imzalanıb. Ümumi dəyəri 1,2 milyard avrodan çox olan saziş bir neçə əsas istiqaməti əhatə edir.

Ukraynanın müdafiə naziri Denis Şmıqalın sözlərinə görə, onlardan biri "Patriot" sistemləri üçün ehtiyat hissələrinin uzunmüddətli tədarüküdür. Bu da mövcud komplekslərin daha sürətli təmiri, modernləşdirilməsi və bərpasına imkan verəcək.

Bundan əlavə, 200 milyon avro məbləğində Ukrayna istehsalı pilotsuz uçuş aparatlarının alınması və 200 ədəd "Boqdan" özüyeriyən artilleriya qurğusunun yeni Zetros şassisi üzərində istehsalı üzrə ümumi dəyəri 750 milyon avro olan layihə razılaşdırılıb.