Bill Qeytsin ən sevimli avtomobili hansıdır? | Milyarderin seçimi gözlənilməz oldu

Bir çox insanlar hesab edirlər ki, milyarderlər öz statuslarını başqalarına göstərmək üçün lüks avtomobil sürməyə üstünlük verirlər. Bununla belə, istisnalar var.

"Top Speed" jurnalı "Microsoft"un həmtəsisçisi Bill Qeytsin sevimli avtomobili haqqında məlumat verib. Milyarderin seçimi olduqca gözlənilməz olub.

Qeyd olunur ki, Meyers qardaşlarının podkastı zamanı B.Qeyts sevimlisi olan kompakt elektrik avtomobilinin olduğunu paylaşıb. Bu, qırmızı rəngli "Fiat 500e RED Edition"dır.

Milyarder bildirib ki, avtomobil onların birgə xeyriyyə işləri nəticəsində irlandiyalı musiqiçi Bono tərəfindən hədiyyə edilib. Onlar qlobal sağlamlıq proqramları üzərində işləyən təşkilatlara yardım göstərirlər.

B.Qeyts əlavə edib ki, onun daha dəbdəbəli elektrik avtomobili də var − "Porsche Taycan". Bununla belə, ona ən müsbət emosiyalar verən "Fiat 500e"dir.

"İnsanların yanından keçəndə onlar məni belə kiçik avtomobildə görəndə təəccüblənirlər", − milyarder deyib.

Nəşr xatırladıb ki, "Fiat 500e" kompakt elektrik hetçbekdir. Bu model Avropa ölkələrində ən populyardır.

Bundan əlavə, "Fiat 500e" xoş idarəetməyə malikdir və onun kiçik batareyası kifayət qədər tez doldurulur. Jurnalistlər gündə 200 kilometrdən az sürən, lakin əla kompakt elektrik avtomobili axtaran sürücülərə bu modelə diqqət etməyi tövsiyə ediblər.