BMT Baş katibindən çağırış | Münaqişənin genişlənməsindən narahatıq

İsrail hərbçiləri Livanda “Hizbullah” təşkilatının daha əvvəl öldürülmüş Baş katibi Həsən Nəsrullahın 2 xələfini artıq məhv edib.

Bu sözləri ölkənin Baş naziri Benyamin Netanyahu Livan xalqına müraciətində deyib.

“Biz “Hizbullah”ın imkanlarını zəiflətmişik, minlərlə terrorçunu, o cümlədən H.Nəsrullahın özü, onun xələfi və xələfinin də xələfini öldürmüşük. Bu gün “Hizbullah” uzun illərdən bəri olduğundan daha zəifdir”, – deyə Baş nazir bildirib.

Bu arada, BMT Baş katibi Antonio Quterreş Livanda tərəfləri atəşkəsə çağırıb. Baş katib Yaxın Şərqdə davam edən münaqişənin genişlənməsindən dərin narahatlıq keçirdiyini bildirib. A.Quterreş qeyd edib ki, İsrailin Beyrut da daxil olmaqla Livanın bir çox bölgələrinə endirdiyi genişmiqyaslı zərbələr nəticəsində son 2 həftədə 1500 nəfər həyatını itirib.

“Livanda hərtərəfli müharibənin astanasındayıq. Livan səlahiyyətliləri 1 milyondan çox insanın məcburi köçkün olduğunu bildirir. Tərəfləri atəşkəsə çağırırıq”, – deyə Baş katib əlavə edib.