BMT-dən Qəzza ilə bağlı vacib çağırış

Birləşmiş Millətlər Təşkilatının Ümumdünya Ərzaq Proqramı Qəzza zolağındakı vəziyyət yaxşılaşmasa, regionda rəsmi olaraq qıtlığın elan ediləcəyini bildirib. Bu aclıq isə 21-ci əsrin 5-ci kütləvi humanitar böhranı kimi tarixə düşəcək.

Son hesabatlara görə, Qəzzada qida istehlakının kəskin azalması və qida çatışmazlığı müşahidə edilməklə aclıq həddi 3/2 göstəricisinə çatıb. Aclığın elan edilməməsinə səbəb isə ölüm halları ilə bağlı üçüncü göstəricinin hələlik hesabatlaşdırılmamasıdır.

Bununla belə, humanitar böhranla bağlı ölüm hallarının artmasına dair kifayət qədər sübut var. Məlumata görə, hazırda Qəzzada hər üç nəfərdən biri acdır. 500 mindən çox insan, yəni əhalinin təxminən dörddə biri isə aclığa yaxın bir şəraitə dözməyə məcburdur.

Sözsüz ki, bütün bunlar xəstəxanalara da təsirini göstərib. Apreldən bəri kəskin qida çatışmazlığından 20 000-dən çox azyaşlı müalicə edilib.

Qeyd edək ki, mayda azı yarım milyon insanın bu vəziyyətlə üzləşəcəyi proqnozlaşdırılıb və İsrail tərəfinə qlobal səviyyədə çağırışlar edilib. Lakin görünən mənzərə bu çağırışların heç nəyi dəyişə bilmədiyini deməyə əsas verir.