BMT ilk dəfə bəyan etdi ki... | Qəzzada ölüm halları kəskin arta bilər

Birləşmiş Millətlər Təşkilatı 2023-cü ilin oktyabrın 7-dən bəri başlayan İsrail-Fələstin münaqişəsindən sonra ilk dəfə Qəzzada fəlakətli aclıq vəziyyətinin yaşandığını elan edib.

Bununla əlaqədar olaraq BMT-nin tərkibində fəaliyyət göstərən müxtəlif qurumlar və humanitar təşkilatlar birgə bəyanat yayıblar.

Bildirilib ki, bu vəziyyət kəskin ərzaq çatışmazlığı şkalasının ən yüksək səviyyəsidir.

“Qəzza zolağında yarım milyondan çox insan qida çatışmazlığı və yoxsulluqdan aclıq çəkir”, – deyə sənəddə qeyd olunub.

Bəyanatda sentyabrın sonunadək Qəzzada vəziyyətin “fəlakətli” olacağı bildirilir. Həmçinin qeyd olunub ki, gələn ilin iyun ayına qədər Qəzzada 5 yaşına qədər 132 min uşaq qida çatışmazlığı təhlükəsi ilə üzləşəcək. 59 səhifəlik hesabatda “dərhal və miqyaslı cavab” tələb edilib.

“İstənilən gecikmə aclıqla əlaqəli ölüm hallarının artmasına səbəb olacaq”, – hesabatda qeyd olunub.

Öz növbəsində, İsrail hakimiyyəti bu hesabatı “yalan və qərəzli” adlandırıb.

BMT-nin Baş katibinin humanitar məsələlər üzrə müavini Tomas Fletçer Cenevrədə keçirdiyi brifinqdə bəyan edib ki, əgər hərbi əməliyyatlar dayandırılarsa və Qəzza zolağındakı keçid məntəqələrinin işləməsinə icazə verilərsə, humanitar təşkilatlar Qəzza sakinlərini ərzaq və humanitar yardımla təmin edə bilər.