Bolqarıstan Putinin təyyarəsi üçün hava dəhlizi verməyə hazırdır

Bolqarıstan Rusiya Prezidenti Vladimir Putinin təyyarəsinin ABŞ Prezidenti Donald Trampla danışıqlar aparmaq üçün Macarıstana uçması üçün hava dəhlizi verməyə hazırdır.

Bu barədə Bolqarıstan xarici işlər naziri Georgi Georgiyev Rusiya mediasına bildirib.

“Sülhə nail olmaq üçün səylər göstərilirsə, qarşıya qoyulan məqsədə çatmaq üçün bütün şəraitin təmin edilməsi məntiqlidir”, – nazir deyib.

Polşa xarici işlər naziri Radoslav Sikorski bundan əvvəl bəyan edib ki, Varşava Putinin təyyarəsinin ölkənin hava məkanı vasitəsilə Macarıstana uçmasına icazə verməyə bilər.

“Polşa məhkəməsi Vladimir Putini daşıyan təyyarəni Beynəlxalq Cinayət Məhkəməsinə (BCM) təhvil vermək üçün hökumətə Polşanın hava məkanında saxlanması barədə göstəriş verə bilər”, – nazir əlavə edib.

BCM 2023-cü il martın 17-də Vladimir Putin və Rusiyanın uşaq hüquqları üzrə komissarı Mariya Lvova-Belovanın həbsi üçün beynəlxalq orderlər verib. Hər ikisi ukraynalı uşaqları qanunsuz deportasiya etməkdə şübhəli bilinir. Bu, BMT Təhlükəsizlik Şurasının daimi üzvü olan bir dövlətin rəhbərinə qarşı verilən ilk belə orderdir.

Avropa İttifaqı ölkələri bu səbəbdən Rusiya Prezidentinin təyyarəsinin onların hava məkanlarından keçməsinə ehtiyatla yanaşırlar.

ABŞ və Rusiya prezidentlərinin yaxın həftələrdə Budapeştdə görüşü gözlənilir.