Böyük güclər nüvə ehtiyatlarını artırır

Doqquz nüvə gücü 2025-ci ildə nüvə arsenallarını modernləşdirmək və genişləndirmək proqramlarını davam etdirib. Dövlətlər getdikcə daha çox milli güc aləti kimi nüvə silahlarından istifadə edirlər.

Bu barədə Stokholm Beynəlxalq Sülh Araşdırmaları İnstitutunun hesabatında deyilir.

2026-cı ilin yanvar ayına olan məlumata görə, dünyada 12187 döyüş başlığı var ki, bunlardan da 9745-i potensial istifadə üçün anbarlarda saxlanılır. 4012 raket təyyarələrə quraşdırılıb, 2100–2200-ü isə döyüşə hazır vəziyyətdə saxlanılır.

Hesabatın müəllifləri qeyd edirlər ki, Rusiya və ABŞ birlikdə bütün istifadəyə yararlı nüvə başlıqlarının təxminən 83 %-nə sahibdirlər. Çinin isə təxminən 620 nüvə başlığı var və o, nüvə arsenalını digər ölkələrdən daha sürətlə genişləndirib, hətta 2025-ci ildə keçirilən hərbi paradda bir neçə yeni nüvə sistemini nümayiş etdirib.

Vurğulanıb ki, Böyük Britaniya və Fransanın da döyüş başlıqları ehtiyatlarını artıracağı gözlənilir. 2025-ci ildə Hindistanla Pakistan yenidən nüvə arsenalını bir qədər genişləndirib və bu silahlar üçün yeni növ çatdırılma sistemləri inkişaf etdiriblər.

Stokholm Beynəlxalq Sülh Araşdırmaları İnstitutu hesab edir ki, Şimali Koreyanın təxminən 60 döyüş başlığı var və ən azı 30 ədəd daha istehsal etmək üçün kifayət qədər materialı mövcuddur. Nüvə silahına sahib olduğunu açıq şəkildə etiraf etməyən İsrailin də arsenalını modernləşdirdiyinə inanılır.