Bricit Makronun qızı anası ilə bağlı xəbərlərdən danışdı

Bricit Makronun qızı Tifen Ozye Paris məhkəməsində Fransanın birinci xanımının kişi olaraq doğulması barədə internetdəki yalan iddiaların anasının həyat keyfiyyətini pisləşdirdiyini və onun hər gün geyindiyi paltarlar və özünü necə aparması barədə narahat olmağa məcbur qaldığını bildirib.

41 yaşlı hüquqşünas Tifen Ozye Bricit Makrona qarşı sosial mediada onun kişi olduğu barədə şayiələr yaratmaq və ya yenidən paylaşmaqla onlayn təzyiq göstərməkdə ittiham olunan 10 nəfərin məhkəmə prosesinə şahid kimi çağırılıb.

Ozye bildirib ki, anasının şəxsi fotoları mənfi şərhlərlə internetdə yerləşdirilib.

Qeyd olunub ki, yaşları 41-dən 60-a qədər olan səkkiz kişi və iki qadın Bricit Makronu onlayn təqib etdiklərinə görə Paris məhkəməsində hakim qarşısına çıxarılıb.

Bricit Makronun ilk nikahından doğulan üç övladından biri olan Ozye bildirib ki, sosial mediadakı yazılar anasının sağlamlığının və həyat keyfiyyətinin pisləşməsinə səbəb olub.

"Bir gün, bir həftə keçmir ki, kimsə ona bu barədə danışmasın. Onun üçün ən ağırı isə ailəsinə olan təsiridir. Onun nəvələrinə deyirlər: "Nənən yalan danışır" və ya "Nənən əslində sənin babandır". Bu ona çox təsir edir. O bunu necə dayandıracağını bilmir... Onu seçməyiblər, o heç nəyə can atmayıb və daim bu hücumlara məruz qalır. Mən onun qızı, bir qadın və ana kimi onun həyatını heç kimə arzulamazdım", – deyə Ozye qeyd edib.