Makron ailəsindəki yaş fərqini pedofiliya ilə eyniləşdirənlər həbs olunacaq?

Fransanın birinci xanımı Bricit Makronun guya kişi kimi doğulduğu və transgender olduğu barədə saxta iddialarla bağlı daha bir məhkəmə prosesi çərçivəsində, oktyabrın 27-si Parisdə 10 nəfər məhkəmə qarşısına çıxıb. Digər məhkəmə oktyabrın 28-i baş tutub.

Yaşları 41 ilə 60 arasında dəyişən 8 kişi və 2 qadından ibarət olan 10 nəfər Paris cinayət məhkəməsində Bricit Makronun cinsi kimliyi və oriyentasiyası barədə çoxsaylı təhqiramiz şərhlər yazmaqda, həmçinin onun həyat yoldaşı ilə yaş fərqini “pedofiliya” ilə eyniləşdirməkdə ittiham olunur.

Yerli medianın məlumatına görə, prokurorlar bu şəxslərə qarşı irəli sürülən ittihamları təsdiqləyib. Əgər təqsirli bilinsələr, onlar iki ilədək həbs cəzası ala bilərlər. 

Bricit Makronun cinsi kimliyi ilə bağlı iddialar ABŞ-də də yayılmağa başlayıb. Buna görə də Bricit Makron və Emmanuel Makron podkastçı Kendis Ouensə qarşı böhtan iddiası qaldırıblar.

İddia Ouensin Fransanın birinci xanımının guya kişi kimi doğulduğu barədə söylədiyi fikirlərlə bağlıdır. Saxta iddialara görə, guya 72 yaşlı Bricit Makron “Jan-Mişel Troqnyö” adı ilə, yəni onun böyük qardaşının adı ilə doğulub.

Prezident ailəsi əsasən bu və 24 illik yaş fərqinə yönəlmiş tənqidlərlə üzləşir. Fransanın birinci xanımı 2024-cü ilin avqustunda şikayətçi olub. Bundan sonra kibertəqib işi üzrə istintaq aparılaraq bir sıra həbslər həyata keçirilib.