Britaniya bu il 40 ilin rekord sazişlərini imzalayıb

2025-ci ildə Böyük Britaniya müttəfiq ölkələrlə müdafiə texnikasının satışı üzrə ümumilikdə 27 milyard dollar dəyərində sazişlər imzalayıb.

Bu göstərici son 40 ildə rekord sayılır. Britaniya hökumətinin məlumatına görə, razılaşmalar arasında ölkə tarixində ən böyük hərbi gəmi ixracı müqaviləsi və bir nəsil ərzində ən iri qırıcı təyyarə satışı da yer alır.

Bu arada, Yaponiya hökuməti də növbəti maliyyə ili üçün rekord həcmdə – 785 milyard dollarlıq büdcəni təsdiqləyib. Büdcənin əhəmiyyətli hissəsi müdafiə sahəsinin gücləndirilməsinə yönəldilib.

Digər tərəfdən, Çinin ABŞ-dəki səfirliyi Vaşinqtonun Tayvana silah tədarükü planlarını tənqid edib. Pekin hesab edir ki, bu addımlar vəziyyəti daha da gərginləşdirəcək və Tayvan boğazında hərbi qarşıdurma riskini artıracaq. Çin tərəfi bildirib ki, ABŞ-nin bu cür addımları istənilən nəticəni verməyəcək.

Şimali Koreya lideri Kim Çen In da sursat və raket istehsalının artırılmasının vacibliyini vurğulayıb. O, hərbi-sənaye müəssisələrinə baxış keçirərək istehsalın genişləndirilməsinin gələcək tələbatın ödənməsi üçün zəruri olduğunu qeyd edib.