Bu, bütün dünyaya yayılıb! - Bəşəriyyət görünməmiş fəlakətlərlə üz-üzə

İnsanlıq tarixinin ən dağıdıcı dövrü müəyyən edilib. Məlum olub ki, eramızın 536-cı ili bəşəriyyətin ən ağır ili olub.

Bu barədə Harvard Universiteti alimlərinin "Science" jurnalında dərc olunan məqalələrində bildirilir.

Tədqiqatın nəticələri göstərib ki, məhz 536-cı ildə Avropa və Asiyanı əhatə edən qlobal iqlim anomaliyaları və fəlakətlər genişmiqyaslı sosial və tarixi sarsıntıların tətikləyicisi olub.

Alimlərin sözlərinə görə, 18 ay ərzində geniş ərazilər Günəş işığını demək olar ki, tamamilə bloklayan qalın dumana bürünüb.

Tədqiqatçılar hesablayıblar ki, o dövrün gündüz işıqlanması ay parlaqlığından artıq olmayıb. Bu, orta temperaturun 2,5 dərəcə selsi düşməsinə səbəb olub.

Kəskin soyuqlaşma məhsul qıtlığına və kənd təsərrüfatının çökməsinə, ardınca da kütləvi aclığa gətirib çıxarıb.

Yer kürəsinin şimalında güclü vulkan stratosferə böyük miqdarda kül və kükürd turşusu atıb ki, bu da qlobal qaranlığın səbəbi olub.

Ekoloji və ərzaq fəlakəti tarixdə qeydə alınmış ilk pandemiyalardan biri olan Yustinian taununun yayılması ilə müşayiət olunub. Xəstəlik o zaman demək olar ki, bütün dünyaya yayılıb və tarixçilərin qiymətləndirmələrinə görə, 50 milyon insanın həyatına son qoyub.

Zəlzələlər, daşqınlar və uzunmüddətli epidemiyalar bütöv sivilizasiyaların dayanıqlığını sarsıdıb.