Bu ölkədə internetə qoşulmaq əl yandırır | Mask sayəsində isə artıq...

Afrikada “Starlink” xidmətinə giriş bölgədəki simli internet xidmətlərindən daha ucuzdur.

Bu barədə “Rest of World” portalı məlumat yayıb.

Jurnalistlər qeyd ediblər ki, bir çox ölkələrdə peyk interneti adi simli əlaqədən nəzərəçarpacaq dərəcədə bahadır.

Bununla belə, Afrika ölkələrində “Starlink” xidmətlərinin yerli provayderlərin təkliflərindən xeyli ucuz olduğu ortaya çıxıb.

Analitiklər müəyyən ediblər ki, 16 ölkədən ən azı 5-də peyk internetinə qoşulmaq adi haldan daha sərfəlidir. Belə ki, Keniyada Amerika valyutasına çevrildikdə yerli internet ayda 23, “Starlink” isə 10 dollar edir. Qana, Mozambik, Yaşıl Burun adalarında da oxşar situasiyadır.

Ən böyük boşluq Zimbabvedədir. Burada yerli provayder internet üçün 300-dən 630 dollara qədər pul tələb edir, “Starlink” isə 30 dollara başa gəlir.

Beləliklə, “Rest of World” İlon Maskın xidmətini Afrika ölkələri üçün xilas adlandırıb.

Hesabat müəllifləri həmçinin qeyd ediblər ki, “Starlink” Keniyada o qədər populyarlaşıb ki, şirkət yeni abunəçilərin qeydiyyatını dayandırıb.