Bu ölkədə qaydalar sərtləşdirildi | Heyvan sahibi sürücülər hansı halda həbs ediləcək?

İtaliyada yol hərəkəti qaydalarının pozulmasına görə cəzaları sərtləşdirən qanun parlamentin aşağı palatasının yekun təsdiqindən sonra qüvvəyə minib.

Avtomobil idarə edərkən telefondan istifadəyə görə cərimə 250-dən 1000 avroya qədər artırılır. Bundan əlavə, qanun pozucusu avtomatik olaraq bir həftədən üç aya qədər nəqliyyat vasitəsini idarə etmək hüququndan məhrum edilir.

Maşını sərxoş vəziyyətdə idarə etdikdə dərhal altı aya qədər bu hüquqdan məhrumetmə nəzərdə tutulur. Cərimələr 6 min avroya çatdırılır.

Yenilənmiş məcəllə geniş yayılmış elektrik skuterlərindən istifadəyə məhdudiyyətlər qoyur. Belə ki, skuter sürmək üçün dövlət nömrə nişanı almaq, dəbilqə taxmaq və müvafiq sığortaya sahib olmaq lazımdır.

Həmçinin ev heyvanlarını yolda atıb gedən sürücülərə qarşı ən ağır cəzalar tətbiq edilib. Bu cinayət altı aydan bir ilədək müddətə sürücülük hüququndan məhrumetmə ilə cəzalandırılır.

Tərk edilmiş ev heyvanının səbəb olduğu qəzada insanlar ölərsə və ya yaralanarsa, onun sahibi yeddi ilədək həbs cəzası ala bilər.